News Continuous Bureau | Mumbai
ભારતીય ટીમે ન્યુઝીલેન્ડ સામેની બીજી T20 મેચમાં વિસ્ફોટક જીત નોંધાવી છે. ભારતે ૨૦૯ રનનો વિશાળ લક્ષ્યાંક માત્ર ૯૨ બોલમાં હાંસલ કરી લીધો હતો. આ જીતમાં કેપ્ટન સૂર્યકુમાર યાદવે ૩૭ બોલમાં ૮૨ રન બનાવ્યા હતા, પરંતુ જીતનો પાયો ઈશાન કિશને નાખ્યો હતો. ઈશાન કિશને મુશ્કેલ સમયમાં આવીને માત્ર ૨૧ બોલમાં ફિફ્ટી ફટકારી હતી અને ૩૨ બોલમાં ૧૧ ચોગ્ગા અને ૪ છગ્ગાની મદદથી ૭૬ રન બનાવ્યા હતા.જોકે, આ તોફાની બેટિંગ દરમિયાન કેપ્ટન સૂર્યા નોન-સ્ટ્રાઈકર એન્ડ પર ઉભા રહીને કંઈક વિચારી રહ્યા હતા.
શા માટે સૂર્યાને ગુસ્સો આવ્યો?
મેચ બાદ જ્યારે સૂર્યકુમાર યાદવને તેમની અને ઈશાનની ભાગીદારી વિશે પૂછવામાં આવ્યું, ત્યારે તેમણે હસતા હસતા કહ્યું કે, “મને ઈશાન પર ગુસ્સો આવી રહ્યો હતો કારણ કે તે પાવરપ્લેમાં મને સ્ટ્રાઈક જ આપી રહ્યો ન હતો!” હકીકતમાં, જ્યારે બંને વચ્ચે ૪૩ બોલમાં ૧૦૦ રનની ભાગીદારી થઈ, ત્યારે તેમાંથી ૩૧ બોલ તો માત્ર ઈશાને જ રમ્યા હતા અને ૭૬ રન બનાવી લીધા હતા. સૂર્યાને માત્ર ૧૩ બોલ રમવાની તક મળી હતી અને તે સમયે તેના ખાતામાં માત્ર ૧૯ રન હતા.
આ સમાચાર પણ વાંચો : Vasudhaiva Kutumbakam: પરિવાર, સમાજ અને વૈશ્વિક વ્યવસ્થા પર સંવાદને પ્રોત્સાહન સાથે ‘વસુધૈવ કુટુમ્બકમ કી ઓર 4.0’નું સમાપન
ભારતની ઐતિહાસિક જીત
ભારતે આ મેચમાં માત્ર ૬ રન પર પોતાના બંને ઓપનરોની વિકેટ ગુમાવી દીધી હતી. આવી સ્થિતિમાં ઈશાન કિશને કાઉન્ટર એટેક કર્યો અને ન્યુઝીલેન્ડના બોલરોની લાઈન-લેન્થ બગાડી નાખી. પાવરપ્લેમાં જ ભારતનો સ્કોર ૭૫ રન સુધી પહોંચી ગયો હતો. ઈશાન ૧૦મી ઓવરમાં ઈશ સોઢીના બોલ પર આઉટ થયો હતો, પરંતુ ત્યાં સુધીમાં તેણે ભારતને જીતની ઉંબરે લાવી દીધું હતું. ત્યારબાદ સૂર્યાએ પોતાની સ્ટાઈલમાં બેટિંગ કરીને મેચ પૂરી કરી હતી.
સૂર્યાનું શાનદાર ફોર્મ
સૂર્યાએ પોતાની બેટિંગ વિશે વાત કરતા કહ્યું કે, “હું નેટ્સમાં સારી બેટિંગ કરી રહ્યો છું અને બ્રેક બાદ પરત ફર્યા પછી પ્રેક્ટિસ સેશન પણ ઘણું સારું રહ્યું હતું.” ભારતે આ જીત સાથે શ્રેણી કબજે કરવાની દિશામાં મજબૂત ડગલું ભર્યું છે. ઈશાન અને સૂર્યાની આ જોડીએ સાબિત કરી દીધું છે કે T20 ફોર્મેટમાં ટીમ ઈન્ડિયાના આક્રમક અભિગમને રોકવો મુશ્કેલ છે.
