મનોજ બાજપેયી અને સામન્થા અક્કીનેનીને ‘ફૅમિલી મૅન 2’ માટે આંતરરાષ્ટ્રીય ઍવૉર્ડ મળ્યો, પંકજ ત્રિપાઠી પણ બન્યા વિજેતા; જાણો વિગત

ન્યુઝ કન્ટિન્યુઝ બ્યુરો    

મુંબઈ, 20 ઑગસ્ટ, 2021

શુક્રવાર

એમેઝોન પ્રાઇમ વીડિયોની વેબ સિરીઝ ‘ધ ફૅમિલી મૅન 2’, જે જૂનમાં રિલીઝ થઈ હતી, તેને દર્શકોનો જબરદસ્ત પ્રેમ અને ટેકો મળ્યો હતો. મનોજ બાજપેયી અભિનીત શ્રેણી હવે ફરી એક વખત સમાચારોમાં છે. ઇન્ડિયન ફિલ્મ ફેસ્ટિવલ ઑફ મેલબૉર્ન (IFFM)માં મનોજ બાજપેયીને ‘ધ ફૅમિલી મૅન 2’ માટે બેસ્ટ પર્ફોર્મન્સ મેલ (શ્રેણી) માટે પસંદ કરવામાં આવ્યો છે, જ્યારે શ્રેણીમાં નકારાત્મક ભૂમિકા ભજવનાર અભિનેત્રી સામન્થા અક્કીનેનીની જાહેરાત શ્રેષ્ઠ પ્રદર્શન મહિલા (શ્રેણી) પુરસ્કાર માટે કરવામાં આવી છે.

કોવિડ -19ના કારણે ફિલ્મ ફેસ્ટિવલનું આયોજન ઑનલાઇન કરવામાં આવી રહ્યું છે. રાજ અને ડીકે દ્વારા નિર્દેશિત શ્રેણીમાં મનોજ બાજપેયીએ પારિવારિક જવાબદારીઓ નિભાવવા સાથે ખતરનાક મિશન હાથ ધરતાં કાલ્પનિક ગુપ્તચર સંસ્થા T.A.S.Cના વરિષ્ઠ વિશ્લેષક શ્રીકાંત તિવારીનું પાત્ર ભજવ્યું છે. સામન્થા અક્કીનેનીએ વેબ સિરીઝની દુનિયામાં ‘ધ ફૅમિલી મૅન 2’થી ડેબ્યૂ કર્યું હતું અને આત્મઘાતી આતંકવાદી તરીકેના તેના અભિનયની ખૂબ પ્રશંસા કરવામાં આવી હતી. એમેઝોન પ્રાઇમ વીડિયોની અન્ય શ્રેણી ‘મિર્ઝાપુર 2’ને શ્રેષ્ઠ વેબ સિરીઝ જાહેર કરવામાં આવી. આ શ્રેણીમાં પંકજ ત્રિપાઠી, અલી ફઝલ, દિવ્યેન્દુ શર્મા, કુલભૂષણ ખરબંદા, રસિકા દુગ્ગલ મુખ્ય ભૂમિકામાં હતાં. આ શ્રેણીનું નિર્માણ ફરહાન અખ્તર અને રિતેશ સિધવાની કંપની એક્સેલ એન્ટરટેઇનમેન્ટ દ્વારા કરવામાં આવ્યું છે.

એમેઝોન એલેક્સા પર અમિતાભ બચ્ચનનો અવાજ કેવી રીતે સક્રિય કરવો; જાણો અહીં

અભિનેતા પંકજ ત્રિપાઠીને લેટ્રોબ યુનિવર્સિટી દ્વારા પ્રસ્તુત કરાયેલ ડાયવર્સિટી ઇન સિનેમા ઍવૉર્ડથી સન્માનિત કરવામાં આવ્યો હતો. બેસ્ટ ડિરેક્ટરનો ઍવૉર્ડ અનુરાગ બાસુને ‘લુડો’ માટે મળ્યો. ઇન્ડિયન ફિલ્મ ફેસ્ટિવલ મેલબૉર્નની જ્યુરીમાં રિચા ચઢ્ઢા, ગુનીત મોંગિયા, ઓનીર, ઑસ્ટ્રેલિયન ફિલ્મ નિર્માતા જ્યોફ્રી રાઇટ અને ઑસ્કાર-નોમિનેટેડ એડિટર જીલ બિલકોકનો સમાવેશ થાય છે. સમારોહમાં અનુરાગ કશ્યપ, શુજિત સરકાર, થિયાગરાજન કુમારરાજા અને શ્રીરામ રાઘવન ઉપસ્થિત રહ્યા હતા.