News Continuous Bureau | Mumbai
અમેરિકા અને ઈરાન વચ્ચે થયેલા હંગામી સીઝફાયરને લઈને આંતરરાષ્ટ્રીય સ્તરે ભારે ગૂંચવણ ઉભી થઈ છે. પાકિસ્તાનના વડાપ્રધાન શહબાઝ શરીફે દાવો કર્યો હતો કે આ સમજૂતી લેબનોન પર પણ લાગુ થશે, પરંતુ અમેરિકી ઉપરાષ્ટ્રપતિ જેડી વેન્સે આ દાવાને પાયાવિહોણો ગણાવી ફગાવી દીધો છે. વેન્સે સ્પષ્ટ કર્યું છે કે લેબનોન ક્યારેય આ સીઝફાયર સમજૂતીનો ભાગ હતું જ નહીં.હંગેરીના બુડાપેસ્ટમાં મીડિયા સાથે વાત કરતા જેડી વેન્સે જણાવ્યું હતું કે, પાકિસ્તાની પીએમનો દાવો એક મોટી ગેરસમજનું પરિણામ હોઈ શકે છે. ઈરાની પક્ષે કદાચ એવું માની લીધું હતું કે સીઝફાયરમાં લેબનોન સામેલ છે, પરંતુ અમેરિકાએ આવો કોઈ વાયદો કર્યો નથી. વેન્સે આ મામલે ફેલાવવામાં આવી રહેલા ‘પ્રોપેગન્ડા’ સામે પણ ચેતવણી આપી છે.
શહબાઝ શરીફનો સોશિયલ મીડિયા પર દાવો
શહબાઝ શરીફે સોશિયલ મીડિયા પ્લેટફોર્મ ‘X’ પર ઉત્સાહપૂર્વક જાહેરાત કરી હતી કે પાકિસ્તાનની મધ્યસ્થતા સફળ રહી છે અને લેબનોન સહિત તમામ જગ્યાએ તાત્કાલિક સીઝફાયર લાગુ થશે. તેમણે આને પાકિસ્તાનની મોટી કૂટનીતિક જીત તરીકે રજૂ કરી હતી. જોકે, વેન્સના નિવેદન બાદ પાકિસ્તાનની મધ્યસ્થતા અને વિશ્વસનીયતા પર હવે મોટા પ્રશ્નાર્થ ચિન્હો ઉભા થયા છે.
આ સમાચાર પણ વાંચો : Jaya Bachchan Birthday: જ્યારે જયા બચ્ચન સ્ટાર હતા ત્યારે અમિતાભ કરી રહ્યા હતા સંઘર્ષ: માત્ર 15 વર્ષની ઉંમરે ડેબ્યૂ કરી મચાવી હતી ધૂમ
ઇઝરાયેલના હુમલા અને ઈરાનનો વિરોધ
સીઝફાયરની જાહેરાત છતાં ઇઝરાયેલની (Israel) સેના લેબનોનમાં સતત હુમલા કરી રહી છે. ઈરાન આને સીઝફાયરનું ઉલ્લંઘન ગણાવી રહ્યું છે, જ્યારે અમેરિકા અને ઇઝરાયેલ લેબનોનને એક અલગ મુદ્દો માની રહ્યા છે. જેડી વેન્સે જણાવ્યું કે ઇઝરાયેલના નેતૃત્વએ માત્ર વાતચીતને સફળ બનાવવા માટે લેબનોનમાં થોડો ‘સંયમ’ રાખવાની વાત કરી છે, પરંતુ તે સત્તાવાર રીતે સીઝફાયરની શરતોમાં સામેલ નથી.
શુક્રવારની બેઠક પર વિશ્વની નજર
આ ગેરસમજ અને વિરોધાભાસી નિવેદનોને કારણે પશ્ચિમ એશિયામાં ફરી તણાવ વધવાની ભીતિ છે. ઇસ્લામાબાદમાં શુક્રવારે યોજાનારી બેઠક હવે અત્યંત નિર્ણાયક બની ગઈ છે. વિશ્વભરના નિષ્ણાતો માને છે કે જો સીઝફાયરની શરતો પર સ્પષ્ટતા નહીં થાય, તો શાંતિની આ આશા લાંબો સમય ટકશે નહીં. પાકિસ્તાન માટે પણ આ સ્થિતિ આંતરરાષ્ટ્રીય સ્તરે ક્ષોભજનક સાબિત થઈ છે.
