News Continuous Bureau | Mumbai
અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને હોર્મુઝની ખાડી ખોલવા માટે મંગળવાર સાંજ સુધીની ડેડલાઈન આપી છે. ટ્રમ્પે સ્પષ્ટ શબ્દોમાં કહ્યું છે કે જો ઈરાન આ માર્ગ નહીં ખોલે તો તેના પાવર પ્લાન્ટ અને પુલો સુરક્ષિત રહેશે નહીં. જોકે, ઈરાને આ ધમકી સામે ઝૂકવાને બદલે એક મોટી શરત મૂકી છે. ઈરાનનું કહેવું છે કે હોર્મુઝ ત્યારે જ ખુલશે જ્યારે તેના ટ્રાન્ઝિટ ટોલનો એક હિસ્સો યુદ્ધમાં થયેલા નુકસાનની ભરપાઈ માટે વાપરવામાં આવશે.
ટ્રમ્પનું અલ્ટીમેટમ અને ઈરાનની ‘નરક’ માં જવાની ચેતવણી
ડોનાલ્ડ ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર ઈરાનને આકરા શબ્દોમાં ધમકાવતા લખ્યું કે, “મંગળવારે ઈરાનમાં પાવર પ્લાન્ટ ડે અને બ્રિજ ડે એકસાથે ઉજવવામાં આવશે, હોર્મુઝ ખોલો નહીંતર નરકમાં જાવ.” ટ્રમ્પે ‘વોલ સ્ટ્રીટ જર્નલ’ ને આપેલા ઈન્ટરવ્યુમાં પણ પુનરોચ્ચાર કર્યો કે જો મંગળવાર રાત સુધીમાં કોઈ ડીલ નહીં થાય, તો અમે બધું ઉડાવી દેવા અને તેલ પર કબજો કરવા વિશે વિચારી રહ્યા છીએ.
આ સમાચાર પણ વાંચો : Divyanka Tripathi Baby Shower: દિવ્યાંકા ત્રિપાઠી અને વિવેક દહિયા ટૂંક સમયમાં બનશે માતા-પિતા, બેબી શોવરની તસવીરો વાયરલ
ઈરાની સ્પીકરની ચેતવણી: ‘આખો વિસ્તાર સળગી ઉઠશે’
ટ્રમ્પની ધમકી પર પ્રતિક્રિયા આપતા ઈરાની સંસદના સ્પીકર ગાલિબાફે કહ્યું કે અમેરિકાના આ લાપરવાહ પગલાંનો અર્થ એ થશે કે આખો વિસ્તાર યુદ્ધની જ્વાળામાં સળગી ઉઠશે. તેમણે આરોપ લગાવ્યો કે ટ્રમ્પ નેતન્યાહુના આદેશોનું પાલન કરી રહ્યા છે જે અમેરિકાને એક નરક તરફ ધકેલી રહ્યા છે. ઈરાની અધિકારી મહેદી તબાતબાઈએ સ્પષ્ટ કર્યું છે કે હોર્મુઝના રસ્તેથી પસાર થતા જહાજો પાસેથી વસૂલવામાં આવતા ટોલનો હિસ્સો તેમને મળવો જોઈએ.
ભારત માટે કેમ વધી શકે છે મુશ્કેલી?
ભારત માટે આ વિવાદ ઉર્જા સંકટ ઊભું કરી શકે છે. જોકે તેલની અછત હજુ વર્તાઈ રહી નથી, પરંતુ એલપીજી (LPG) નો પુરવઠો મોટો પડકાર બની રહ્યો છે. હોર્મુઝ બંધ હોવાથી મિડલ ઈસ્ટથી આવતા યુરિયા અને ડીએપી (DAP) ખાતરનો સપ્લાય પણ ખોરવાયો છે. જો આ વિવાદ જલ્દી નહીં ઉકેલાય તો ભારતીય ખેતી અને રાંધણ ગેસના ગ્રાહકો માટે મુશ્કેલી વધી શકે છે. સરકાર અત્યારે ગ્રાહકોને ઝડપથી પીએનજી (PNG) પર શિફ્ટ કરી રહી છે.
