News Continuous Bureau | Mumbai

Donald Trump:ઈરાન સાથેના વધતા તણાવ અને યુદ્ધની સ્થિતિ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે હોર્મુઝની ખાડીને લઈને નવો વિવાદ છેડ્યો છે. મીડિયા રિપોર્ટ મુજબ, જ્યારે ટ્રમ્પને પૂછવામાં આવ્યું કે શું તેઓ ઈરાનને હોર્મુઝમાં ટેક્સ લેવાની મંજૂરી આપશે, ત્યારે તેમણે વળતો પ્રહાર કરતા કહ્યું, “અમે પોતે જ ટોલ કેમ ન લઈએ? હું તેમને શુલ્ક લેવા દેવાને બદલે પોતે લેવાનું પસંદ કરીશ. અમે વિજેતા છીએ અને આ યુદ્ધ અમે જીતી લીધું છે.”

હોર્મુઝ પર અમેરિકાના કબજાનો દાવો

ટ્રમ્પે દાવો કર્યો છે કે ઈરાન હવે માત્ર ‘મનોવૈજ્ઞાનિક યુદ્ધ’ રમી રહ્યું છે. તેમણે ઈરાનની પાણીમાં માઈન્સ બિછાવવાની ધમકીઓને નકારી કાઢતા કહ્યું કે અમેરિકા પાસે હવે એક એવી યોજના છે જેના હેઠળ હોર્મુઝ પર અમારું નિયંત્રણ હશે અને ત્યાંથી પસાર થતા જહાજોએ અમેરિકાને ટોલ આપવો પડશે. જોકે, હકીકત એ છે કે ઈરાને હજુ પણ આ માર્ગ પર નાકાબંધી ચાલુ રાખી છે અને અમેરિકી ફાઈટર જેટ્સને પણ નિશાન બનાવ્યા છે.

આ સમાચાર પણ વાંચો : Stock Market Crash:શેરબજાર અપડેટ: યુદ્ધના ભણકારા વચ્ચે સેન્સેક્સમાં મોટી ઉથલપાથલ, 800 પોઈન્ટ તૂટ્યા બાદ ફરી ગ્રીન ઝોનમાં પહોંચ્યું માર્કેટ.

 શા માટે હોર્મુઝ આટલું મહત્વનું છે?

સ્ટ્રેટ ઓફ હોર્મુઝ એ વિશ્વનો સૌથી મહત્વપૂર્ણ દરિયાઈ માર્ગ છે જે ખાડી દેશોને હિંદ મહાસાગર સાથે જોડે છે. યુદ્ધ પહેલા દુનિયાનો લગભગ 20 ટકા તેલ અને ગેસ (LNG) નો પુરવઠો આ રસ્તેથી પસાર થતો હતો. ઈરાન અને ઓમાનની સરહદમાં આવતા આ માર્ગ પર ઈરાને હાલમાં અવરજવર બંધ કરી દીધી છે. ટ્રમ્પ ઈચ્છે છે કે ઈરાન બિનશરતી આ રસ્તો ખોલી નાખે, અન્યથા તેના પાવર પ્લાન્ટ્સ અને પુલો પર ભયાનક હુમલા કરવામાં આવશે.

 ટ્રમ્પનું અલ્ટીમેટમ અને વિરોધાભાસી નિવેદનો

ટ્રમ્પના આ નિવેદને ખુદ અમેરિકામાં પણ આશ્ચર્ય પેદા કર્યું છે. એક તરફ તેઓ ઈરાનને તબાહ કરવાની ધમકી આપી રહ્યા છે, તો બીજી તરફ યુદ્ધ લગભગ ખતમ થઈ ગયું હોવાનો દાવો કરી રહ્યા છે. તાજેતરમાં જ ઈરાને અમેરિકાના A-10 ફાઈટર પ્લેનને તોડી પાડ્યાનો વીડિયો વાયરલ થયો હતો, જે ટ્રમ્પના ‘વિજય’ના દાવા પર સવાલ ઉભા કરે છે. આમ છતાં, ટ્રમ્પ પોતાની શરતો મનાવવા માટે ઈરાન પર દબાણ વધારી રહ્યા છે.