News Continuous Bureau | Mumbai
Vladimir Putin આજે એટલે કે ૪ ડિસેમ્બરના રોજ સાંજે રશિયાના રાષ્ટ્રપતિ વ્લાદિમીર પુતિન ભારત પહોંચશે. યુક્રેન યુદ્ધ પછીની આ તેમની પહેલી ભારત યાત્રા છે. નવી દિલ્હીના ઇન્દિરા ગાંધી ઇન્ટરનેશનલ એરપોર્ટ પર તેમનું સ્વાગત કરવામાં આવશે અને તેઓ સીધા વડાપ્રધાન આવાસ એટલે કે ૭, લોક કલ્યાણ માર્ગ જશે, જ્યાં વડાપ્રધાન નરેન્દ્ર મોદી સાથે પ્રાઈવેટ ડિનર કરશે. બંને દેશો રાજકીય, આર્થિક, સંરક્ષણ, ઊર્જા, વિજ્ઞાન-ટેકનોલોજી, સંસ્કૃતિ અને માનવીય ક્ષેત્રો પર ચર્ચા કરશે.
IL-96 જેટલાઇનર વિમાનથી પહોંચશે પુતિન અને સખત સુરક્ષા
પુતિનનું વિમાન સાંજે ૪:૩૦ વાગ્યે લેન્ડ કરશે. જોકે, કેટલાક રિપોર્ટ્સમાં ૬:૩૦ વાગ્યાનો સમય પણ જણાવવામાં આવ્યો છે. પુતિનના આગમનને લઈને સુરક્ષા ખૂબ જ સખત છે. આખી રાજધાની ૫ લેયરના સુરક્ષા ઘેરામાં ઘેરાયેલી છે. દિલ્હી પોલીસ, કેન્દ્રીય એજન્સીઓ અને પુતિનની પર્સનલ ટીમો દરેક પગલાં પર નજર રાખશે. એસડબ્લ્યુએટી ટીમો અને એન્ટી-ટેરર સ્ક્વોડ રસ્તાઓ પર તૈનાત રહેશે.
રાજઘાટ પર શ્રદ્ધાંજલિ અને હૈદરાબાદ હાઉસમાં સમિટ
૫ ડિસેમ્બરના રોજ સવારે ૧૧ વાગ્યે રાષ્ટ્રપતિ દ્રૌપદી મુર્મુ રાષ્ટ્રપતિ ભવનમાં પુતિનનું સ્વાગત કરશે, જ્યાં તેમને ગાર્ડ ઓફ ઓનર આપવામાં આવશે. ત્યારબાદ પુતિન રાજઘાટ જશે અને મહાત્મા ગાંધીને શ્રદ્ધાંજલિ અર્પણ કરશે. બપોરે, હૈદરાબાદ હાઉસમાં ૨૩મું ભારત-રશિયા વાર્ષિક શિખર સંમેલન યોજાશે. પીએમ મોદી અને પુતિન પહેલા એકલામાં અને પછી ડેલિગેશન સાથે દ્વિપક્ષીય વાતચીત કરશે. તેઓ સંરક્ષણ સોદાઓ પર ધ્યાન કેન્દ્રિત કરશે, જેમ કે એસયુ-૫૭ ફાઇટર જેટ, એસ-૫૦૦ મિસાઇલ સિસ્ટમ અને બ્રહ્મોસ મિસાઇલનું નવું વર્ઝન. બંને નેતાઓ ટ્રેડ અસંતુલન (ભારત ૬૫ બિલિયન ડોલરની આયાત કરે છે અને ૫ બિલિયન ડોલરની નિકાસ કરે છે) સુધારવાનો પ્રયાસ પણ કરશે.
આ સમાચાર પણ વાંચો : Vladimir Putin: પુતિનનો ભારત પ્રવાસ બંને દેશો માટે કેમ મહત્ત્વનો? સંરક્ષણ, ઓઇલ સેક્ટર અને મિસાઇલ અપગ્રેડની વિગતો
ભારત મંડપમમાં ભાષણ અને આલીશાન દાવાત
સાંજે ભારત મંડપમમાં બંને નેતાઓ ભારત-રશિયા બિઝનેસ ફોરમમાં સંબોધન કરશે. અહીં વેપાર, મેન્યુફેક્ચરિંગ અને ટેકનોલોજી પર ફોકસ રહેશે. આ ઉપરાંત, રશિયા ટુડે ચેનલ ભારતમાં ૧૦૦ કર્મચારીઓ સાથે પોતાનું બ્યુરો ખોલશે. ત્યારબાદ રાષ્ટ્રપતિ મુર્મૂ પુતિનના સન્માનમાં સ્ટેટ બેન્ક્વેટ એટલે કે આલીશાન દાવાત આપશે. રાત્રે ૯:૩૦ વાગ્યે પુતિન પરત ફરશે. આ પ્રવાસ લગભગ ૨૮-૩૦ કલાકનો રહેશે.
