News Continuous Bureau | Mumbai
IndiaUS Relation। અમેરિકાના વિદેશ સચિવ માર્કો રુબિયોના ચાર દિવસીય દિલ્હી પ્રવાસે ભારત અને અમેરિકાના સંબંધોમાં ફરી એકવાર નવી ઉર્જા અને ગરમાટો લાવી દીધો છે. આ પ્રવાસ માત્ર ઔપચારિક ન રહેતા બંને દેશો વચ્ચેના વ્યાપારિક અને વ્યૂહાત્મક સંબંધોને એક નવા આયામ પર લઈ ગયો છે. પાછલા કેટલાક સમયથી ચાલી રહેલા ટેરિફ (ટેક્સ) વિવાદના કારણે સંબંધોમાં જે કડવાશ આવી હતી, તેના પર રુબિયોના પ્રવાસે મલમ લગાવવાનું કામ કર્યું છે. દિલ્હીમાં તેમણે ભારતઅમેરિકા સંબંધો, ક્વાડ (Quad), દરિયાઈ સુરક્ષા અને આર્થિક ભાગીદારી જેવા અનેક મહત્વના મુદ્દાઓ પર સકારાત્મક ચર્ચા કરી છે. આ દરમિયાન રુબિયો ભારત માટે ઘણી મોટી ખુશખબરીઓ લાવ્યા છે, જેની વિગતો નીચે મુજબ છે
અમેરિકાની આઝાદીના કાર્યક્રમમાં ડોનાલ્ડ ટ્રમ્પનો અચાનક ફોન; પીએમ મોદીના કર્યા જોરદાર વખાણ
નવી દિલ્હીમાં જ્યારે અમેરિકાના 250મા સ્વતંત્રતા દિવસ નિમિત્તે ‘ફ્રીડમ 250’ ની ઉજવણી ચાલી રહી હતી અને માર્કો રુબિયો ત્યાં હાજર હતા, ત્યારે જ અચાનક ભારતમાં અમેરિકી રાજદૂત સર્જિયો ગોરના ફોન પર ડોનાલ્ડ ટ્રમ્પનો કોલ આવ્યો હતો. ટ્રમ્પે લાઉડસ્પીકર પર ત્યાં હાજર તમામ લોકો સાથે સીધી વાત કરી અને સ્પષ્ટ કર્યું કે તેઓ ભારત વિશે શું વિચારે છે. ટ્રમ્પે કહ્યું, “હું અહીં ઉપસ્થિત તમામ લોકોને નમસ્કાર કહેવા માંગુ છું. મને વડાપ્રધાન નરેન્દ્ર મોદી ખૂબ જ પસંદ છે, તેઓ મારા સારા મિત્ર છે. હું પીએમ મોદીનો બહુ મોટો ફેન છું.” ટ્રમ્પે વધુમાં ઉમેર્યું કે, “અમેરિકા અને ભારત ઇતિહાસમાં ક્યારેય આટલા નજીક નહોતા આવ્યા. ભારત મારા પર અને અમારા દેશ પર 100 ટકા ભરોસો રાખી શકે છે. જો તેમને ક્યારેય પણ મદદની જરૂર પડશે, તો તેઓ જાણે છે કે ક્યાં ફોન કરવાનો છે – તેઓ સીધો અહીં જ ફોન કરશે.”
વડાપ્રધાન મોદીને અમેરિકા આવવાનું ખાસ આમંત્રણ અને ટ્રેડ ડીલના સંકેત
વિદેશ સચિવ માર્કો રુબિયોએ વડાપ્રધાન નરેન્દ્ર મોદી સાથેની મુલાકાતમાં જણાવ્યું કે અમેરિકી રાષ્ટ્રપ્રમુખ ડોનાલ્ડ ટ્રમ્પે તેમને વૉશિંગ્ટન આવવાનું વિશેષ આમંત્રણ પાઠવ્યું છે. આ આમંત્રણને બંને દેશો વચ્ચે વધુ મજબૂત થઈ રહેલા રાજદ્વારી સંબંધોના પ્રતીક તરીકે જોવામાં આવી રહ્યું છે. રુબિયોએ ભારપૂર્વક જણાવ્યું કે ભારત માત્ર અમેરિકાનો મિત્ર નથી, પરંતુ સૌથી મહત્વપૂર્ણ વ્યૂહાત્મક ભાગીદારોમાંનો એક છે. આ ઉપરાંત, ભારત-અમેરિકા વ્યાપાર કરાર અંગે તેમણે મોટી આશા વ્યક્ત કરતા કહ્યું કે આગામી થોડા અઠવાડિયામાં જ આ ડીલ પર હસ્તાક્ષર થઈ શકે છે. હાલમાં તેના અંતિમ દસ્તાવેજો પર કામ ચાલી રહ્યું છે અને આ માત્ર ટેક્સ સંબંધિત બાબત નથી, પરંતુ આધુનિક યુગની આર્થિક ભાગીદારીને મજબૂત કરવાનો મોટો પ્રયાસ છે.
ઈરાન સંઘર્ષ પર મોટી જાહેરાતની શક્યતા; હોર્મુઝની સામુદ્રધુની ખુલતા ભારતને થશે મોટો ફાયદો
માર્કો રુબિયોએ ભારતીય વિદેશ મંત્રી ડૉ. એસ. જયશંકર સાથેની સંયુક્ત પ્રેસ કોન્ફરન્સમાં સંકેત આપ્યો હતો કે અમેરિકા-ઈરાન સંઘર્ષના અંત માટે આગામી થોડા કલાકોમાં મોટી જાહેરાત થઈ શકે છે. ટ્રમ્પ પ્રશાસન ઈરાન સાથે એક એવા કરાર તરફ આગળ વધી રહ્યું છે જે વૈશ્વિક વેપાર માટે ગેમ ચેન્જર સાબિત થશે. જો આ અંતર્ગત હોર્મુઝની સામુદ્રધુની ફરીથી સંપૂર્ણપણે ખુલ્લી મુકાશે, તો આંતરરાષ્ટ્રીય બજારમાં ક્રૂડ ઓઈલના સપ્લાયની ચિંતા દૂર થશે અને ભારતને આર્થિક સ્તરે બહુ મોટી રાહત મળશે. આ સાથે જ, અમેરિકામાં ભારતીયો પર થતી નસ્લીય ટિપ્પણીઓ અંગે રુબિયોએ કડક વલણ અપનાવતા કહ્યું કે અમેરિકા દરેકનું સ્વાગત કરનારો દેશ છે અને આવી બાબતોને ગંભીરતાથી લેવામાં આવશે. તેમણે ભારતીય વિદેશ મંત્રી એસ. જયશંકરના કુશળ નેતૃત્વના પણ ભારોભાર વખાણ કર્યા હતા.
👉 આ સમાચાર વાચો:
Weather Alert। મહારાષ્ટ્રનું બ્રહ્મપુરી દેશમાં સૌથી ગરમ નોધાયું, નવતપાના આગામી ૭ દિવસ માટે હવામાન વિભાગની મોટી આગાહી
