News Continuous Bureau | Mumbai

Israel-Iran War Update અમેરિકા, ઈઝરાયેલ અને ઈરાન વચ્ચે ચાલી રહેલું યુદ્ધ હવે ૧૧મા દિવસમાં પ્રવેશ્યું છે અને સ્થિતિ વધુ વણસી રહી છે. અમેરિકી રાષ્ટ્રપતિ ડોનાલ્ડ ટ્રમ્પે ફ્લોરિડામાં રાત્રે ૩ વાગ્યે (ભારતીય સમય મુજબ) એક મહત્વની પ્રેસ કોન્ફરન્સ યોજી હતી. ટ્રમ્પે દાવો કર્યો હતો કે આ યુદ્ધ “ખૂબ જ જલ્દી” ખતમ થઈ જશે, કારણ કે અમેરિકા અને ઈઝરાયેલના હુમલાઓએ તેમના લક્ષ્યો હાંસલ કરી લીધા છે. જોકે, ઈરાને આ દાવાને ફગાવી દેતા સ્પષ્ટ કર્યું છે કે જંગના અંતનો સમય અમેરિકા નક્કી કરી શકે નહીં.ઈરાની રિવોલ્યુશનરી ગાર્ડ્સ (IRGC) એ ટ્રમ્પના નિવેદન પર આકરો જવાબ આપતા કહ્યું કે, “યુદ્ધનો અંત અમે નક્કી કરીશું. આ વિસ્તારના સમીકરણો અને ભવિષ્ય હવે અમારી સશસ્ત્ર દળોના હાથમાં છે. અમેરિકી દળો આ યુદ્ધ ખતમ નહીં કરે.” ઈરાનનો આ જવાબ ટ્રમ્પની તે ચેતવણી બાદ આવ્યો છે જેમાં તેમણે કહ્યું હતું કે જો ઈરાને હથિયાર હેઠા ન મૂક્યા તો તેના પર અત્યાર સુધીના સૌથી ભયાનક હુમલા કરવામાં આવશે.

ટ્રમ્પનો ચોંકાવનારો દાવો – “ઈરાન એક અઠવાડિયામાં હુમલો કરવાનું હતું”

પ્રેસ કોન્ફરન્સ દરમિયાન ટ્રમ્પે મોટો ખુલાસો કરતા કહ્યું કે જો અમેરિકાએ પહેલા હુમલો ન કર્યો હોત, તો ઈરાન એક અઠવાડિયાની અંદર અમેરિકા પર મોટો હુમલો કરવાની તૈયારીમાં હતું. ટ્રમ્પના મતે ઈરાન પાસે મિસાઈલોનો મોટો જથ્થો હતો અને તેઓ ઈઝરાયેલ સહિત આખા મધ્ય-પૂર્વને નિશાન બનાવવાના હતા. ટ્રમ્પે ફરી એકવાર સ્પષ્ટ કર્યું કે અમેરિકા ઈરાનમાં જમીની સૈનિકો નહીં મોકલે, પરંતુ ઈરાન પાસે ‘બિનશરતી શરણાગતિ’ સિવાય બીજો કોઈ રસ્તો નથી.

ઈઝરાયેલના ઈરાનના કમાન્ડ સેન્ટરો પર જોરદાર હુમલા

યુદ્ધના ૧૧મા દિવસે ઈઝરાયેલની વાયુસેનાએ ઈરાનના મધ્ય વિસ્તારોમાં આવેલા IRGC ના કમાન્ડ સેન્ટરો, મિસાઈલ ફેસિલિટીઝ અને લશ્કરી ઈન્ફ્રાસ્ટ્રક્ચર પર નવા હુમલા કર્યા છે. બીજી તરફ બેરૂતમાં હિઝબુલ્લાહના ઠેકાણાઓ પર પણ હુમલા તેજ કરવામાં આવ્યા છે. જવાબમાં ઈરાને પણ ઈઝરાયેલ પર બેલેસ્ટિક મિસાઈલ અને ડ્રોન એટેક ચાલુ રાખ્યા છે. આ યુદ્ધ હવે માત્ર બે દેશો પૂરતું મર્યાદિત ન રહેતા બહેરીન, કુવૈત અને UAE સુધી પહોંચી ગયું છે, જ્યાં અમેરિકી સૈન્ય મથકો પર ડ્રોન હુમલાના અહેવાલો છે.

આ સમાચાર પણ વાંચો : LPG Rule Change: ઈરાન યુદ્ધની અસર હવે રસોડા સુધી! ગેસની અછત રોકવા સરકાર એક્શન મોડમાં; LPG સિલિન્ડરના બુકિંગ માટે નવો નિયમ લાગુ.

ગ્લોબલ ઈકોનોમી પર સંકટના વાદળો

આ યુદ્ધની સૌથી મોટી અસર તેલના ભાવો પર પડી છે, જે ૨૦૨૨ પછીના સર્વોચ્ચ સ્તરે પહોંચી ગયા છે. જો ઈરાન હોર્મુઝની ખાડીમાં તેલનો સપ્લાય રોકશે તો વૈશ્વિક અર્થતંત્ર પડી ભાંગશે તેવી ભીતિ સેવાઈ રહી છે. સાઉદી અરેબિયામાં વધુ એક અમેરિકી સૈનિકનું મોત થતા અત્યાર સુધીમાં કુલ ૮ અમેરિકી સૈનિકોએ જીવ ગુમાવ્યા છે. દુનિયાભરના દેશો અત્યારે શાંતિની અપીલ કરી રહ્યા છે, પરંતુ ઈરાનના નવા સુપ્રીમ લીડર આયતુલ્લા મુજ્તબા ખામેનેઈ નમતું જોખવા તૈયાર હોય તેવું લાગતું નથી.