News Continuous Bureau | Mumbai

Atal Setu Coastal Road Connector  મુંબઈ અને નવી મુંબઈ વચ્ચેના અંતરને ઘટાડતા ‘અટલ બિહારી વાજપેયી શિવડી-ન્હાવા શેવા અટલ સેતુ’ (Atal Setu) અને નવી મુંબઈ કોસ્ટલ રોડના જોડાણનું કામ અત્યારે ચર્ચામાં છે. આ બંને માર્ગો જોડાઈ જવાથી મુંબઈથી નવી મુંબઈ એરપોર્ટ સુધી સીધી કનેક્ટિવિટી મળશે. જોકે, પર્યાવરણીય મંજૂરીઓને કારણે આ પ્રોજેક્ટ અત્યારે થોડો વિલંબમાં મુકાયો છે.

ક્યાં અને કેવી રીતે થશે આ બંને માર્ગોનું જોડાણ?

કુલ 21 કિમી લાંબો અટલ સેતુ હાલમાં શિવડીથી ચિર્લે સુધી છે. મુંબઈ મેટ્રોપોલિટન રિજિયન ડેવલપમેન્ટ ઓથોરિટી (MMRDA) એ શિવાજીનગર (ગવાણ, નવી મુંબઈ) ખાતે ઇન્ટરચેન્જ (Interchange) સુવિધા ઊભી કરી છે. આ ઇન્ટરચેન્જ પર છ રેમ્પ જોડીને અટલ સેતુને નવી મુંબઈ કોસ્ટલ રોડ સાથે જોડવાનું આયોજન છે. આ કનેક્ટર તૈયાર થવાથી મુસાફરો સીધા નવી મુંબઈ એરપોર્ટ સુધી પહોંચી શકશે, પરંતુ મેન્ગ્રોવ્સના કાપણીનો મુદ્દો અહીં અડચણરૂપ બન્યો છે.

CRZ મંજૂરી અટકવા પાછળનું અસલી કારણ

આ પ્રોજેક્ટ માટે અંદાજે 4510.81 ચોરસ મીટર વિસ્તારમાં મેન્ગ્રોવ્સની કાપણી કરવી જરૂરી છે. MMRDA એ મહારાષ્ટ્ર કોસ્ટલ ઝોન મેનેજમેન્ટ ઓથોરિટી (MCZMA) પાસે મંજૂરી માટે અરજી કરી હતી. જોકે, વન વિભાગના મેન્ગ્રોવ સેલના જણાવ્યા અનુસાર, અસરગ્રસ્ત થનારા વૃક્ષોની ચોક્કસ સંખ્યા હજુ સ્પષ્ટ નથી. જ્યાં સુધી સ્થળ પર જઈને વૃક્ષોની ગણતરી કરવામાં ન આવે અને તેનો સચોટ રિપોર્ટ રજૂ ન થાય, ત્યાં સુધી CRZ મંજૂરી આપી શકાય તેમ નથી.

આ સમાચાર પણ વાંચો : Maharashtra Weather Update: મહારાષ્ટ્રમાં હાડ થીજવતી ઠંડી! ઉત્તરના પવનોએ મુંબઈ સહિત રાજ્યને ઠુંઠવી દીધું, જાણો આગામી 48 કલાકમાં ક્યાં પડશે વધુ ઠંડી

મુસાફરો અને પરિવહન પર શું થશે અસર?

નવી મુંબઈ કોસ્ટલ રોડ લગભગ તૈયાર છે, પરંતુ અટલ સેતુ સાથેનું તેનું જોડાણ અટકેલું હોવાથી મુસાફરોને તેનો પૂરો લાભ મળી રહ્યો નથી. આ કનેક્ટર પર ટોલ નાકા પણ બનાવવામાં આવનાર છે, જેના માટે 4383.16 ચોરસ મીટર જમીનની જરૂર પડશે. પર્યાવરણીય મંજૂરી મળ્યા બાદ જ આ કામ આગળ વધી શકશે. એકવાર આ જોડાણ પૂર્ણ થઈ ગયા પછી, મુંબઈ અને નવી મુંબઈ એરપોર્ટ વચ્ચેનું મુસાફરીનું અંતર અને સમય બંનેમાં ધરખમ ઘટાડો થશે.