Gold Silver Rates Today। જો તમે લગ્નસરાની સિઝન માટે અથવા રોકાણ (ઇન્વેસ્ટમેન્ટ) ના હેતુથી સોના કે ચાંદીના દાગીના ખરીદવાનું વિચારી રહ્યા છો, તો તમારે આજના લેટેસ્ટ ભાવો વિશે જાણવું અત્યંત જરૂરી છે. દેશ અને વિદેશના સરાફા બજારમાં છેલ્લા કેટલાક દિવસોથી કિંમતોમાં ભારે ઉતારચઢાવ જોવા મળી રહ્યો છે, જેના કારણે રોકાણકારો અને સામાન્ય ગ્રાહકો ચિંતામાં મૂકાયા છે. બુધવારે, ૨૭ મે ૨૦૨૬ ના રોજ સવારે મલ્ટી કોમોડિટી એક્સચેન્જ (MCX) પર સોના અને ચાંદીના વાયદા બજારમાં એક મોટો ઉલટફેર જોવા મળ્યો છે. વૈશ્વિક બજારમાં ડોલરના મૂલ્યમાં ઘટાડો અને ક્રૂડ ઓઈલના ભાવોની અસર વચ્ચે ચાંદીના ભાવે એક નવો રેકોર્ડ બનાવ્યો છે.

ચાંદીમાં ૧,૩00 નો તોતિંગ વધારો

બુધવારે સવારે ૯:૩૨ વાગ્યાના સત્તાવાર આંકડા અનુસાર, સોનાનો જુલાઈ વાયદો (Gold Futures) બજારમાં ૧,૫૭,૫૧૧ પ્રતિ ૧૦ ગ્રામના સ્તર પર સામાન્ય ઘટાડા અથવા સ્થિરતા સાથે ટ્રેડ કરતો જોવા મળ્યો હતો. બીજી તરફ, ચાંદીના ભાવોમાં જોરદાર તેજી જોવા મળી છે. ચાંદી વાયદા બજારમાં ૧,૩૦૦ ના તોતિંગ વધારા સાથે પ્રતિ કિલોગ્રામ દીઠ ૨,૭૧,૮૨૩ ની રેકોર્ડબ્રેક સપાટી પર વેપાર કરી રહી હતી. પર્શિયન ગલ્ફમાં વધી રહેલા ભૌગોલિક-રાજકીય (જીઓ-પોલિટિકલ) તણાવ અને લાંબા સમય સુધી મોંઘવારી ઊંચી રહેવાના ડર વચ્ચે કેન્દ્રીય બેંકો વ્યાજદરો ઊંચા રાખી શકે છે, જેના કારણે ચાંદીની આ તેજી પર થોડો અંકુશ પણ જોવા મળ્યો છે.

ઈઝરાયેલનો લેબનાન પર ભયાનક હુમલો

પશ્ચિમ એશિયા (મિડલ ઈસ્ટ) માં ચાલી રહેલો સૈન્ય સંઘર્ષ વધુ ઉગ્ર બન્યો છે. સોમવારે અમેરિકા દ્વારા દક્ષિણ ઈરાનમાં કરવામાં આવેલા હુમલા બાદ, મંગળવારે ઈઝરાયેલી સેનાએ દક્ષિણ લેબનાન પર પ્રચંડ એરસ્ટ્રાઈક કરી હતી. ‘અલ જઝીરા’ ના અહેવાલ મુજબ, આ ઈઝરાયેલી હુમલામાં ૩૧ લોકોના કમકમાટીભર્યા મોત નીપજ્યા છે, જ્યારે ૪૦ થી વધુ લોકો ગંભીર રીતે ઘાયલ થયા છે. જો કે, રાહતની વાત એ છે કે અમેરિકા અને ઈરાન વચ્ચે ગત ૮ એપ્રિલના રોજ જાહેર થયેલો યુદ્ધવિરામ (Ceasefire) હજુ પણ કાગળ પર કાયમ છે અને બંને દેશો મધ્યસ્થીઓ દ્વારા વિવાદ ઉકેલવા ચર્ચા કરી રહ્યા છે, જેના કારણે સોનાની કિંમતોમાં મોટો વિસ્ફોટ થતાં અટક્યો છે.

૨૮ ફેબ્રુઆરીથી શરૂ થયેલા યુદ્ધ બાદ સોનાના ભાવો પર દબાણ

બજારના વિશ્લેષકોના મતે, ચાલુ વર્ષે ૨૮ ફેબ્રુઆરીના રોજ અમેરિકા અને ઈરાન વચ્ચે સૈન્ય સંઘર્ષ શરૂ થયો ત્યારથી જ સોનાના ભાવો પર સતત આંતરરાષ્ટ્રીય દબાણ જોવા મળી રહ્યું છે. પશ્ચિમ એશિયાના આ યુદ્ધની શરૂઆતથી લઈને અત્યાર સુધીમાં વૈશ્વિક બજારમાં સોનાના ભાવમાં અંદાજે ૧૫ ટકા જેટલો મોટો ઘટાડો નોંધાયો છે. વૈશ્વિક બજારને ડર છે કે ઊર્જા અને ઇંધણના વધતા ભાવોના કારણે દુનિયાભરમાં મોંઘવારી વધશે અને તેના પરિણામે કેન્દ્રીય બેંકો વ્યાજદરમાં (Interest Rates) વધારો કરશે. આ આશંકાના કારણે જ અત્યારે કિંમતી ધાતુઓ એટલે કે સોના અને ચાંદીના ભાવો દબાણ હેઠળ છે અને તેમાં સતત ચઢાવ-ઉતાર આવી રહ્યા છે.

👉 આ સમાચાર વાચો:
Central Railway Station Food Price Hike। મુંબઈકરોની મુશ્કેલીમાં વધારો સેન્ટ્રલ રેલ્વે સ્ટેશનો પર વડાપાવ અને સમોસાના ભાવમાં તોતિંગ વધારો, ૧ જૂનથી લાગુ થશે નવા દર