News Continuous Bureau | Mumbai

Gold Price Today: અમેરિકા અને ઈરાન વચ્ચે ફરી એકવાર યુદ્ધના વાદળો ઘેરાતા તેની સીધી અસર સોના-ચાંદીના ભાવ પર જોવા મળી રહી છે. ઈસ્લામાબાદમાં યોજાયેલી શાંતિ વાટાઘાટો નિષ્ફળ ગયા બાદ અને ડોનાલ્ડ ટ્રમ્પે હોર્મુઝની નાકાબંધીના આદેશ આપતા આંતરરાષ્ટ્રીય બજારમાં ભારે અસ્થિરતા સર્જાઈ છે. અઠવાડિયાના પ્રથમ દિવસે, સોમવારે ભારતીય બજારમાં સોનાના ભાવમાં થોડો ઘટાડો જોવા મળ્યો છે, પરંતુ એકંદરે ટ્રેન્ડ તેજી તરફ હોવાનું જણાય છે.સોમવાર, ૧૩ એપ્રિલના રોજ રાજધાની દિલ્હીમાં ૨૪ કેરેટ સોનાનો ભાવ ₹૧,૫૨,૯૮૦ પ્રતિ ૧૦ ગ્રામ રહ્યો છે. આંતરરાષ્ટ્રીય બજારમાં સ્પોટ ગોલ્ડનો ભાવ પ્રતિ ઔંસ ૪,૭૭૭.૧૭ ડોલર પર પહોંચી ગયો છે.

મુખ્ય શહેરોમાં સોનાના તાજા ભાવ

દેશના વિવિધ મુખ્ય શહેરોમાં સોનાના ભાવમાં તફાવત જોવા મળી રહ્યો છે, જેમાં ૨૨ કેરેટ અને ૨૪ કેરેટ સોનાના ભાવમાં પણ ફેરફાર નોંધાયા છે. મુંબઈમાં ૨૨ કેરેટ સોનાનો ભાવ ₹1,40,090 અને ૨૪ કેરેટનો ભાવ ₹1,52,830 રહ્યો છે, જ્યારે અમદાવાદમાં આ ભાવ અનુક્રમે ₹1,40,140 અને ₹1,52,880 પર પહોંચ્યા છે. દિલ્હી અને જયપુર બંને શહેરોમાં સોનાનો દર સમાન સ્તરે એટલે કે ૨૨ કેરેટ માટે ₹1,40,240 અને ૨૪ કેરેટ માટે ₹1,52,980 રહ્યો છે. ખાસ નોંધનીય બાબત એ છે કે, દક્ષિણ ભારતના ચેન્નાઈ શહેરમાં સોનું દેશમાં સૌથી મોંઘા દરે વેચાઈ રહ્યું છે, જ્યાં ૨૨ કેરેટના ૧૦ ગ્રામનો ભાવ ₹1,40,990 અને ૨૪ કેરેટનો ભાવ ₹1,53,810 સુધી પહોંચી ગયો છે.

આ સમાચાર પણ વાંચો : Asha Bhosle Net Worth: આશા ભોંસલેનું આલીશાન સામ્રાજ્ય: 250 કરોડની સંપત્તિ અને લક્ઝરી લાઈફસ્ટાઈલ, જાણો કોણ સંભાળશે આ વિરાટ વારસો?

ચાંદીના ભાવમાં પણ ઘટાડો

સોનાની સાથે સાથે ચાંદીના ભાવમાં પણ આજે ઘટાડો નોંધાયો છે. ૧૩ એપ્રિલના રોજ ૧ કિલો ચાંદીનો ભાવ ઘટીને ₹૨,૫૯,૯૦૦ પર પહોંચી ગયો છે. અત્રે ઉલ્લેખનીય છે કે, આ વર્ષે જાન્યુઆરીમાં ભારતમાં ચાંદીનો ભાવ ₹૪ લાખના ઐતિહાસિક સ્તરને પાર કરી ગયો હતો. હાલમાં આંતરરાષ્ટ્રીય બજારમાં ચાંદીનો સ્પોટ ભાવ પ્રતિ ઔંસ ૭૫.૯૧ ડોલર છે.

યુદ્ધના જોખમથી ભાવમાં વધારો થવાની શક્યતા

જો અમેરિકા અને ઈરાન વચ્ચેનો વિવાદ વધુ વણસશે અને હોર્મુઝ જળમાર્ગ લાંબો સમય બંધ રહેશે, તો નિષ્ણાતો માને છે કે સોનું સલામત રોકાણ (Safe Haven) હોવાથી તેના ભાવમાં વધુ મોટો ઉછાળો આવી શકે છે. પાછલા અઠવાડિયામાં જ ૨૪ કેરેટ સોનું ₹૧૯૧૦ અને ૨૨ કેરેટ સોનું ₹૧૭૫૦ જેટલું મોંઘું થઈ ચૂક્યું છે.